Па працы і гонар! Хойніцкія аграрыі прымалі ўзнагароды ў абласным цэнтры

Сёння ў Гомелі напярэдадні Дня работнікаў сельскай гаспадаркі і перапрацоўчай прамысловасці АПК ушаноўвалі лепшых з лепшых прадстаўнікоў гэтай важнай для краіны галіны.

Удзел у гэтай яркай падзеі прыняла і дэлегацыя Хойнікшчыны на чале са старшынёй райвыканкама Дзмітрыем Шпігановічам.

– Вялікі гонар адчуваю за хойнічан, якія напярэдадні свайго прафесійнага свята прымаюць узнагароды высокай годнасці. Гэта неацэнная ўдзячнасць за старанне і сапраўдны подзвіг, які кожны з іх здзяйсняе дзеля ўсіх нас. Здаўна прафесіі "ад зямлі" шанаваліся ў народзе, А мы ад продкаў перанялі гэтую важную традыцыю і не забываем дзякаваць землякоў за самаадданую працу дзеля забеспячэння харчовай бяспекі ўсяго краю, – адзначыў Дзмітрый Мікалаевіч.

Не проста падзяліць урачыстасць падзеі, але і прыняць заслужаныя ўзнагароды прыехалі хойнічане.

Хто ж заняў прызавыя месцы ў абласным спаборніцтве? Вадзіцель ААТ «Велецін Агра» Валянцін Кардаш на адвозцы кармоў ад камбайнаў стаў лепшым.

Падзяка Прэзідэнта Рэспублікі Беларусь аб'яўлена трактарысту-машыністу КСУП «Эксабаза» Стралічава» Сяргею Лобану, падзяка Міністэрства сельскай гаспадаркі і перапрацоўчай прамысловасці – начальніку МТК «Пудакоў» ААТ «Велецін Агра» Андрэю Макаранку, трактарысту-машыністу КСУП «імя І.П. Мележа» Васілю Кузьменка.

Брыгадзір МТФ ААТ «Велецін Агра» Мікалай Камеш заняў трэцяе месца сярод брыгадзіраў МТФ, трэцяе месца сярод аператараў па штучным абнасеньванні жывёл у Аляксандра Дземідзенкі з ААТ «Велецін Агра» (таксама працаўнік удастоены Ганаровай граматы абласнога Савета дэпутатаў).

Падзяка аблвыканкама аб'яўлена кіроўцу КСУП» Судкова» Аляксандру Мастабаю, аператару машыннага даення КСУП «Судкова» Юліі Зубок. Ім узнагароды ўручаць на раённым мерапрыемстве, прымеркаваным Дню работнікаў сельскай гаспадаркі і перапрацоўчай прамысловасці.

Шчыра радаваўся за поспехі сваіх землякоў і калег па галіне начальнік упраўлення сельскай гаспадаркі і харчавання райвыканкама Аляксандр Максімавіч.

– Кожны з хойнічан, хто сёння падымаўся за сваёй узнагародай, па праве лічыцца патрыётам нашай радзімы, бо дасягаць значных вынікаў у такой няпростай сферы – каштоўна ўдвая! Ганарымся працаўнікамі палёў і ферм, нізкі паклон усім, хто абраў сельскагаспадарчую прафесію і дакладна ёй служыць, – падкрэслівае Аляксандр Аляксандравіч.